lipu toki "jan lawa lili" (Le Petit prince)

ni li lipu toki "jan lawa lili" (Le Petit prince).
jan Male li pana e lipu toki ni lon toki pona.
tenpo pini la kalama musi ni li jo e nimi lon toki Kanse li jo e nimi suli "Le Petit prince".
jan Antowan Te Sentesipeli (Antoine de Saint-Exupéry) tan ma Kanse pali e lipu toki ni lon toki Kanse.
jan li ken lukin e lipu toki ni lon toki Kanse en toki Epelanto en toki Seki en toki ante.

lipu toki "jan lawa lili" li jo e lipu mute. tenpo ni la jan li ken lukin e lipu ni:
PANA PILINLIPU 1LIPU 21
tenpo kama la lipu ante kin li kama.


jan lawa lili

nimi lon toki Kanse tan jan Antoine de Saint Exupéry tan tenpo sike 1943
nimi lon toki pona tan jan Male (tokipona@blahus.cz) tan tenpo sike 2007

PANA PILIN

tawa jan Lewon Wese.

jan lili o weka e pali ike mi ni:
mi pana pilin e lipu toki ni tawa jan suli.
mi jo e tan suli tawa ni:
jan suli ni li jan pona suli mi lon ali.
mi jo e tan ante kin:
jan suli ni li ken sona e ali
li ken sona e lipu kin pi jan lili.
mi jo e tan kin pi nanpa tu wan:
jan suli ni li lon ma Kanse
li pakala tan moku lili en seli lili.
ona li wile mute kute e ijo pona.
tan ali ni li lili la mi ken pana pilin
e lipu toki tawa jan lili.
tenpo pini la jan suli ni li jan lili ni.
jan suli ali li jan lili lon tenpo wan.
(taso jan pi nanpa lili li sona awen e ni.)
tan ni la mi pona e pana pilin mi:

tawa jan Lewon Wese pi jan lili.


pana pilin tan jan pi ante toki:

tawa jan Mila.

lon poka ona la mi kama jo e pilin ni:
mi pana e lipu toki ni tawa toki pona.
ona li pali e mute tawa toki pona mi.

LIPU PI NANPA WAN

mi jan lili la mi lukin e sitelen pi pona lukin lon
lipu toki pi ma kasi suli.
akesi li lon sitelen ni li moku e soweli.
ni li sitelen sama:

lipu toki li toki e ni: "akesi li tu ala e moku ona
li moku e ona ali lon tenpo wan. tan ni la ona li ken ala tawa
li lape moku lon tenpo mute."

tenpo ni la mi pilin mute e ma kasi suli
li pali e sitelen mi pi nanpa wan kepeken
ilo sitelen kule. ona li sitelen mi Wan.
ona li sama e ni:

mi pana e pali suli mi tawa jan suli
li wile sona e ni: sitelen mi li utala ala utala tawa sina?

ona li toki e ni tawa mi: "tan seme la supa lawa li utala?"

taso sitelen mi li jo ala e supa lawa. ona li jo e akesi.
akesi ni li moku e soweli suli pi nena linja.
tan ni la mi sitelen e insa kin pi akesi.
pilin mi la jan suli li sona e ni lon tenpo ni: seme li lon sitelen.
tenpo ali la jan suli li sona ala li wile kute tan jan ante.
sitelen mi pi nanpa tu li sama e ni:

taso jan suli li toki e ni tawa mi: o weka e sitelen
pi akesi open en akesi pini li kama sona
e sona ma e sona pi tenpo pini e sona nanpa e sona nimi.
kepeken ni la mi lili li weka e nasin suli mi
pi pali sitelen. pakala pi sitelen mi
pi nanpa wan en tu li weka e ona.
tenpo ali la jan suli li sona ala e ali li wile kama sona
tan jan lili. taso jan lili li toki tawa ona la li kama lape.

tan ni la mi wile pali e nasin pali ante li kama jan lawa pi
tomo tawa kon. mi tawa ma ali. ni li lon:
sona ma li pona tawa mi. tan ona la mi
sona toki e ni lon tenpo lili: mi lon ma Sonko anu ma Alisona.
jan li tawa pakala lon tenpo pimeja la sona ni li pona mute tawa ona.

tan ni la mi kama sona e jan suli mute
lon tenpo ali. mi lon poka
jan suli li lukin pona e lon ona.
taso tenpo ni kin la mi pilin sama e ona.

jan li kama tawa mi li sama jan pi pilin sona la
mi pana e sitelen mi pi nanpa wan tawa ona.
tenpo ali la mi jo e sitelen ni lon poka mi.
mi wile sona e ni: jan ni li pilin ala pilin pona.
taso tenpo ali la ona li toki e ni tawa mi:

"ni li supa lawa."

ni la kama la mi toki ala e akesi e ma kasi suli
e suno sewi tawa jan ni li kama pilin sama ona.
mi toki e musi lipu e musi pi palisa en sike
e nasin lawa e len linja lon anpa lawa. jan suli li
kama pilin pona tan ni: ona li kama sona e jan pi sona mute.

LIPU PI NANPA LUKA LUKA LUKA LUKA WAN

tenpo ni la soweli loje li kama:
ona li toki e ni: "toki!"
jan lawa lili li toki sama: "toki!"
ona li lukin lon nasin pi monsi ona, taso ona li lukin e ala.
toki ni li kama: "mi lon anpa pi kasi kili."
jan lawa lili li toki e ni: "sina jan seme?
sina pona lukin..."
soweli loje li toki e ni: "mi soweli loje."
jan lawa lili li wile e ni: "o kama musi lon poka mi!
mi pilin ike mute."

soweli loje li toki: "mi ken ala musi lon poka sina.
mi jan poka ala tawa sina."
jan lawa lili li toki: "o weka e ike mi."
ona li pilin lili li toki kin:
"jan poka li seme?"
soweli loje li toki e ni: "sina kama ala tan lon ni.
sina lukin e seme?"
jan lawa lili li toki: "mi lukin e jan.
jan poka li seme?"
soweli loje li toki: "jan li jo ilo moli li utala.
ike! ona li jo e waso kin. ijo ante li pona ala
tawa ona. sina lukin ala lukin e waso?"
jan lawa lili li toki: "lukin ala. mi lukin e jan pona.
jan poka li seme?"
soweli loje li toki e ni: "tenpo mute la jan li pilin ala e ona.
ona li toki e ni: pali e pilin poka..."
"e pilin poka?"
soweli loje li toki: "lon. tenpo ni la sina
jan lili taso tawa mi li sama jan lili ante mute mute.
sina ken weka tawa mi. sama la mi ken weka tawa sina.
mi soweli loje taso tawa sina li sama soweli loje ante mute mute.
taso sina pali e jan poka tan mi la mi tu li ken weka ala
tawa mi tu. sina kama suli li kama wan tawa mi lon ali.
mi kama suli li kama wan tawa sina lon ali."
jan lawa lili li toki e ni: "mi kama sona. mi sona
e kasi... mi pilin e ni: ona li pali e jan poka tan mi..."
soweli loje li toki: "ken. ijo ali li lon ma ni..."
jan lawa lili li toki: "a, ni li lon ala ma ni."


soweli loje li wile kama sona mute:
"lon ala lon ma ante?"
"lon."
"jan utala li lon ala lon ma ni?"
"lon ala."
"a! sona musi! waso li lon ala lon?"
"lon ala."
soweli li toki: "ala li jo ala e pakala."
taso ona li toki sin e pilin ona:
"lon mi li sama lon tenpo ali. mi utala e waso.
jan li utala e mi. waso wan li sama waso ante,
jan wan li sama kin jan ante. taso sina pali
e jan poka tan mi la lon mi li kama suno:
mi sona e kalama noka sina. kalama ni li sama ala kalama ante.
kalama noka ante li weka e mi tawa ma. taso kalama noka sina
li toki e tawa mi lon nasin sama kalama musi li pali e ni:
mi tawa tan tomo ma mi. o lukin! sina lukin ala lukin
e ma pi kasi pan ni? mi moku ala e pan. kasi pan
li pona ala tawa mi. ma pi kasi pan li toki ala tawa mi.
taso ni li ike! taso sina jo e linja lawa jelo.
sina pali e jan poka tan mi la ali li pona mute!
kasi pan jelo li toki e sina tawa mi. kin la mi olin
e kalama kon lon kasi pan..."
soweli loje li kama pi toki ala li lukin e jan lili lawa
lon tenpo mute.
ona li toki e ni: "mi wile e ni... o pali e jan poka tan mi!"
jan lawa lili li toki: "mi pali! taso mi jo ala e tenpo mute.
mi wile kama sona e jan pona li wile kama sona e mute."
soweli loje li toki: "jan li pali taso e jan poka tan ijo la
jan li sona e ona. "tenpo ni la jan li jo ala e tenpo li ken ala
sona e ijo. ona li kama jo e ijo pini kepeken mani. taso,
jan li ken ala kama jo e pona kepeken mani. tan ni la jan li ala
e jan pona lon tenpo ni. sina wile jo e jan pona la
o pali e jan poka tan mi!"
jan lili lawa li wile sona e ni: "mi wile pali e seme tawa ni?"
soweli loje li toki e ni tawa ona: "o wile ala e mute lon tenpo
lili. tenpo wan la o tawa lon weka mi - o tawa kasi laso ni.
mi lukin lili e sina, taso sina toki e ala tawa mi.
toki li tan pi utala sona. taso, tenpo suno sin ali la
sina ken tawa lili lon poka mi..."
jan lawa lili li kama sin lon tenpo suno kama.
soweli loje li toki: "nasin pona la o kama sin lon tenpo sama.
sina kama lon tenpo tu tu la mi
kama pilin pona lon tenpo tu wan. tawa tenpo li
pana e pilin pona tawa mi. tenpo tu tu la
mi ken awen ala; mi kama sona
e suli pi pilin pona! taso, sina kama lon tenpo pi sama ala la mi
ken sona ala e ni: mi kama jo e pilin pona lon tenpo seme...
pali sama li suli..."
jan lawa lili li toki e ni: "pali sama li seme?"
soweli loje li toki: "jan li sona ala e ni kin lon tenpo mute.
ni li tu e tenpo suno ali. jan utala mi
kin li pali sama. tenpo suno pi nanpa tu tu la ona li tawa musi
lon poka jan meli lon ma tomo. tan ni la tenpo suno pi nanpa tu tu
li tenpo suno pi pona mute! mi ken tawa ma pi kili sike. jan utala
li tawa musi lon tenpo pi sama ala la tenpo suno ali li sama.
ni li lon la mi jo e tenpo pona lon tenpo ala."

tan ni la jan lawa li pali e jan poka tan soweli loje.
taso tenpo pi kama weka li kama:
soweli loje li toki e ni: "a, mi pana e telo tan oko mi."
jan lawa lili li toki: "ni li pakala sina. mi wile ala pana e ike
tawa sina, taso sina wile kama jan poka mi..."
soweli loje li toki: "lon."
jan lawa lili lo toki: "taso sina kama pana e telo tan oko!"
soweli loje li toki: "lon."
"sina kama jo e ala!"
soweli loje li toki: "mi kama jo e ijo! tan kule pi kasi pan."
ona li toki e ni kin:
"o tawa li lukin e kasi loje! sina kama sona e ni: kasi loje sina
li wan lon ali. o kama sin li toki weka tawa mi. tenpo ni la mi
toki e toki insa tawa sina."

jan lili li tawa li lukin e kasi loje mute:
ona li toki e ni tawa kasi loje ni: "sina sama ala kasi loje mi
li ala lon tenpo ni. sina jan poka tawa jan ala. jan ala li
jan poka sina. tenpo pini la soweli loje mi li sama sina li
soweli loje taso li sama soweli loje ante mute mute. taso ona li
kama jan pona mi li wan tawa mi lon ali."
kasi loje li sona e ni: ona li sona e seme li pali e seme.
jan lili li toki sin: "sina pona lukin, taso ala li lon insa sina.
jan li ken ala moli tan sina. jan ante li ken pilin e ni:
kasi loje mi li sama sina. taso ona taso li suli mute. sina ali li
suli lili. ni li tan ni: tenpo pini la mi pana e telo tawa ona
li pana e ona lon anpa selo li weka e kon tan ona kepeken sinpin
li weka e pipi tan ona (pipi tu wan taso li awen li
kama pipi pona lon tenpo kama.) li kute
e toki ike en pona tan ona li kute
e toki ala ona kin. ona li kasi loje mi!"

tenpo ni la li kama sin tawa soweli loje
li toki e ni: "mi tawa."
soweli loje li toki e ni: "tawa pona. toki insa mi li ni
li pona mute: jan li lukin pona kepeken pilin taso.
jan li ken ala lukin e ijo suli kepeken oko."
jan lawa lili li toki sin: "jan li ken ala lukin e ijo suli
kepeken oko." ona li wile sona awen e ni.
soweli loje li toki: "jan li kama sona ala e sona lon ni.
taso sina o kama sona ala e ona. sina pali e jan poka tan ijo la
sina wile lawa pona tawa ona lon tenpo ali. o lawa pona
tawa kasi loje sina..."
jan lawa lili li toki sin: "mi wile lawa pona tawa kasi loje mi..."
ona li wile sona awen e ni.